صباح يوم جديد حلو بالنسبه لـ سحر .. اليـوم أول يوم تداوم فيه بالمحل .. واللي كان مونسها أكثر إن صديقتها روح بتكون معاها .. صحت الصبح وأهي مفرفشه .. تعدلت ونزلت فطرت .. والمزاج عال العال .. ركبت السياره مع راشد .. وعلى المحل ..
في المحل ** ..
روح : لأ .. لأ تكفيـــــــــــن !! .. حرام قلبي ما يتحمل هالـ جمال .. هههههههه سحور .. صايره قموره ..
سحر بغرور : قلتي شي جديد ؟! ..
روح : قمي زين .. أقول سحور وين أخوج ما أشوفه معاج ؟
سحر : قاعد يتكلم مع مشعل برى ..
روح : أهـــا .. أقول هذا أول يوم يعني لازم نطلع فيه المؤدبات البريئات ..
سحر : أحم .. أحم .. طبعا طبعا ..
روح : أنزين سحور ما قلتي لي .. هو المكان فيه 3 طوابق .. الطابق الاول اللي أهو هذا .. والثاني .. والثالث اللي يكون للشغل يعني لأصحاب المحل .. الحين الطابق الأول والثاني .. لازم كل وحده منا تستلم طابق .. أنتي أي طابق تبين ؟ ..
سحر : أمممممم تعرفيني أنا أستحي .. لهذا راح أخذ الطابق الثاني ..
روح : أجل يلا عطيني عرض أكتافج .. و روحي فوق ضبطي المكان وشوفي كل شي ..
سحر : لحظة لحظة .. أنا ما أعرف الاسعار ولا شي ..!
روح : أوووه صح .. أنا مشعل من شوي علمني .. بس البضاعه اللي فوق غير.. صبري لحد ما يرجع مشعل ويعلمج ..
سحر : ان شاء الله ..
دخل مشعل المحل .. و ألتقت نظراته بنظرات سحر .. كان بينهم لغه عيون .. سحر تحاول تحرق أعصابه وتوتره بنظراتها بأي طريقه كانت .. و أهو كان يحاول يخدرها بنظراته ..
يرفع النظاره الشمسيه عن عينه : هاا شلون وزعتوا نفسكم ؟! ..
روح : أنا أخترت الطابق الاول .. وسحر أختارت الطابق الثاني ..
مشعل يكلم سحر بعين مثبته بالأرض وبنبرة هادئه : سحر .. تفضلي معاي فوق
أرتبكت سحر فأشرت بعينها لروح عشان تصعد معاهم .. روح فهمتها ..
روح بخبث : أوكي مشعل عن أذنكم أنا بروح أشتري من محل قريب وراجعه لكم ..
سحر فتحت عينها بوسعها .. شهالحركات اللي تسويها روح .. قهرتها وكانت شوي وتذبحها .. سخيفه الحين أقول لها تقعد وياي تقول بروح .. لكن هين يا روح أنا أوريج يا ثقيله الدم ..
سحر : روح يعني ما تقدرين تأجلينه شوي ؟
روح بنظره نذاله : لا ما أقدر أعذريني ..
سحر بهمس : يصيــــــر خير
بدون أهتمام عطت روح ظهرها لسحر وطلعت من المحل وأهي ميته من الضحك على شكل سحر وأهي تتوعد فيها .. يحليلها تستحي ..
مشعل : ها نصعد ؟!
سحر وقفت مكانها ما تدري بـ شنو ترد .. هذا شسوي معاه .. معقوله أروح بروحي معاه .. إحراج و ولا راح أفهم ولا شي من اللي راح يقول له .. يا ربي وش أسوي ..
سحر : تفضل ..
مشعل بإحترام : ولو النسـاء أولاً ..
أبتسمـــت سحر ورفعت عبايتها وركبت الدرج بهدوء .. مشـى مشعل وراها .. بـ بطئ أكثر منها .. حتى ركوبها على الدرج ركوب حوريه مو إنسانه .. رقتهــا ما لها مثيـل .. أخلاقها و إحترامها شيء كبير فيها أفتقدوه بنات هذا الزمن ..
وصلت سحر للطابق الثاني .. الطابق أصغر من الأول .. لكن الديكور أحلى .. والمكان هادئ .. البضاعه اللي فوق أعجبتها أكثر من اللي تحت .. شافت المكان اللي راح تقعد عليه .. والله إنه كشخه .. يا حلاتها ساره وأهي تشوفني أنا جالسه عليه .. المكان بارد .. وينوّم .. لأن الاضاءه مسوينها على شكل مكان خافت .. لكن اللي ما عجبها إن المكان فيه لحن موسيقى ..
مشعل : عجبج المكان ؟
سحر : وايد .. بس ...
مشعل : بس شنو ؟
سحر بدون ما تلفت له وبإحراج : بصراحه .. في شي مو عاجبني ..
مشعل : اللي أهو ؟! ..
سحر : الموسيقى اللي حاطينها .. أممم .. أنا تقريبا راح أقضي أغلب يومي هنا .. وما فيني على ذنوب أكثر من اللي عندي .. وانت بعد .. قصدي أنتو .. ما أرضى عليكم .. معقوله تستحمل ذنب كل زبون يدخل ويسمع ؟! ..
مشعل أنحرج حيل .. كلامها أهو يعرفه ويدري فيه بس ... وتذكر ان راشد مره قال له عنها .. حاول يبعد الإحراج عنه .. أبتسـم لها : تامرين أنتي يالشيخه .. أطفي الموسيقى وأبوها ..
سحر منزله راسها : تســلم
مشعل : نكمل ؟
سحر : نكمل ..
كمل مشعل مع سحر وأهو يعلمها .. سحر أرتاحت لأنها كانت متوترة وخايفه ولكن طلع الموضوع اسهل مما كانت تتوقعه .. وأهم شي إنها كانت مرتاحه من حشره الزباين .. لأن الطابق الثاني كان قليلين الزباين اللي فيه ..
----------
عبد الرحمن : أنــــــــــــــــــــــا رجعت !! ..
.. [ لحظة ] .. عبد الرحمن أخو رفا وسحر و راشد الصغير .. آخر العنقود .. عمره 4 سنين .. طول هذي الفتره كان في بيت خالته .. ملقوف .. ومثل الوقت يحب يسوي نفسه كبير ..
أم راشد : هلا والله .. يمه متى رجعت ؟
عبد الرحمن : الحين
أم راشد : ها أستانست في بيت خالتك ؟
عبد الرحمن : إيه يمه وايد .. بيتنا ملل .. هناك عجيب ..
رفا : أحد قال لك أرجع ؟
عبد الرحمن : أنتي سكتي
رفا : شف قليل الأدب .. أحترم نفسك لا أعوي اذنك ..
عبد الرحمن : أففففف أنزين .. يمه شنو الغدا اليوم ؟
أم راشد : برياني لحم ..
عبد الرحمن : واااااااااااااو
أم راشد : ما تغديت يمه ؟ .. الساعه 3 وللحين ما غدتكم خالتك ؟
عبد الرحمن : لا يمه غدتنا بس ما شبعت ..
رفا : وجــع .. كل هذا وما شبعـــــــت !!
أم راشد : قولي ما شاء الله لا إله الا الله ، الله أكبر ..
رفا : الحين ايهي اللي اقولها ؟
عبد الرحمن : كلهم
رفا : أنت أسكت .. والله كان البيت هدوء بلياك ..
عبد الرحمن : أصلاً ماما قالت لي إنج كنتي تبجين تبيني
رفا : الله واكبــــــــــــــــــــــــــر !! .. أصلاً غير كلمة راحه منك ما كنت أقول ..
عبد الرحمن : رفا ؟ .. ليش تقلدين أبوي ؟
رفا : ها ؟ ..
عبد الرحمن : مركبه لج شوارب ؟
رفا تفشلت : يمه شفتي .. صار لي سنه أقول لج شيليه !! ..
أم راشد : والله فاضيه أنتي .. خلصتي الـ 24 وأنتي ما تعرفين .. قولي لسحر تشيل لج ..
رفا : لا يبه لا .. سحر تشيل برطمي معاه ..
--------
سحــر بابتسامه : آآآه .. سهـــل !!
مشعل : أكيـد ؟
سحـر : إي ..
مشعل : ما يتعب ؟
سحر : لأ ما يتعب ..
مشعل : إذا حسيتي إن الشغل فيه تعب كلميني وراح أجيب موظفه تساعدج .. ما أقدر .. على تعبج .. [ يبتسم بخبث ] أقصد ما نقدر ..
سحر تسوي نفسها زعلانه : لهذه الدرجه مو ماليه عينكم ؟
مشعل مات من دلعها : ليتج بس ماليه العين .. أنتي مليتي الـقـلـ ...
روح تصارخ من الطابق الأول : سحــــــــر .. سحــــــــر .. كل هذا تعليـــم .. لو حامل ولدت .. وأنتي للحين تتعلمين .. ما يسوى والله
مشعل تفشل .. حس إنه طوّل زياده معاها .. وسحر أنحرجت .. وحست روحها راح تذبح روح .. ليش تسوي معاها جذي .. حركاتها تنرفز .. أهي تدري إن سحر تستحي حيل .. قلبت وناستها بالمحل إلى زعل وضيق .. وعرفت دام مشعل معاهم بالمحل ما راح تبطل حركاتها ..
مشعل : في شيء تبين تعرفينه بعد ؟
سحر بهدوء : لأ شكراً ..
مشعل بدون ما يلتفت لها : العفو .. صعد الطابق الثالث بنفس متضايقه من حركه روح .. حرام عليها أحرجت البنت معاي ..
سحر بنفسها وبضيق : أعذرني مشعل .. الظاهر ما راح تشوف وجهي معاك مره ثانيه ..
روح صعدت لـ سحر : هااا ما خلصتوا ؟
سحر بنظره قاتله : خير ؟
روح مستغربه من حركه سحر : شصاير سحور ؟ ..
سحر : تسألين بعد ؟ .. شهالحركات هاذي ؟
روح : أبيـــه سحور والله مو قصدي .. أصلا مدري إن مشعل كان هناك .. على بالي صعد الطابق الثالث .. بس كنت اتغشمر وياج مو قصدي شي ..
سحر : بس هاذي مو أول مره .. روح أنتي صديقتي على عيني وراسي .. بس مو قدامه تسوين كذا .. يمكن لو كنت أنا وياج أمشيها مع إني راح أتضايق .. بس قدامه لأ ما أرضى .. أحرجتيني وأحرجتي الريال معاي ..
روح : صدقيني يا سحر ما كنت أقصد ..
سحر اللي متضايقه مره : خلي مبرراتج لنفسج .. أصلاً ما راح تشوفين وجهي مره ثانيه بالمحل .. لأنـي ........
صوت مشعل من الدرج : لأنــج ؟!
تجمدت سحر بمكانها !
مشعل : ما راح تتحركين من مكانج ..
سحر : راح تجبرني يعني ؟
مشعل : لأ ما راح أجبرج .. لكن ما راح تطلعين من هنا ..
سحر تهز رجلها : بس انا ما أبي أبقى ..
مشعل بصرخه هزت سحر و روح : سحــــــــــــــــــــــــــــــــــــــــــر !!
--------
رفا : منو ؟
أم راشد : ناس من طرف خالتج أم فيصل ..
رفا : ماعرفتي منو ؟
أم راشد : لأ والله ما عرفت ..
رفا : طيب متى راح يجون ؟!
أم راشد : أهي كلمتني أمس بس أنا ما شفتج .. وحددوا على بكره ..
رفا : الله .. وشو بكره ؟ .. كذا بهالسهوله ؟!
أم راشد : مو أقول لج أهي كلمتني أمس .. وبعدين قالت لي على يوم الخميس .. بس أنا قلت لها ما نقدر .. لأن ما راح نكون بالبيت ..
رفا : أهــا .. الله يستر بس ..
راشد دخل البيت : سلام الله عليكم
ام راشد : وعليكم السلام ..
رفا : أحم سمعت بالخبر ..
راشد : أي خبر ؟
أم راشد : أختك بكره بيجونا ناس يخطبونها
راشد : ههههههههههههه عادي وين الجديد ؟؟ .. كل مره يجونها ناس .. وترفضهم
رفا بنظره انقراف : قد كلامك يا راشد ؟
راشد بغرور : وقدود ..
رفا : يصير خير ..
أم راشد : أنزين روح جيب أختك من المحل .. ولا بتخليها تنام هناك ؟
راشد : طيب يمه .. بالأول أبي أتعشى بعدها باروح أخذها ..
------------