المجالس السعودية ® - عرض مشاركة واحدة

**» Mïss Fōfő «** · 26-04-2007, 03:37 PM

بسم الله الرحمن الرحيم..

الــــجــزء الاول...

ابو احمد:رجل كبير بالسن ماكان غني بس اشتغل وتعب الى ما صارمن اغنى واشهر رجال الاعمال في السعوديه
ام احمد:متوفيه من 3سنوات
عيالهم هم احمد(ابو عبدالله)و هدى(ام فارس)وعبدالعزيز(ابو سعود)وسعد(ابو مهند)خوله(ام بدور)
وساره(ام عمار)

بكتب لكم اهم العوائل في القصه بالتفصيل والباقي تعداد فقط(عشان ما تتلخبطون )

اولا: عايلة بو عبدالله
ابو عبدالله :رجل اعمال يحب شغله كثيروطيب ويحب عياله واحيانا يكون شوي شديد عليهم
ام عبدالله: تزوجة وهي صغيره ما تشتغل تحب اكثر واحد من عيالها محمد
ريم:متزوجه وساكنه بالرياض وعندها بنت اسمها جود(5 سنين) عبدالعزير(3سنوات)وهي حامل
عبدالله : يشتغل بشركة ابوه وابوه يعتمد عليه متزوج وحده من قرايبهم (ابرار) وعنده بنت ولد تؤام(ريان و ريناد)..
خالد:عمره 26بعده ماتزوج يشتغل في شركة ابوه ويحب اخته الهنوف كثير(طويل عريض شعره بني عيونه كباروهو شوي اسمر)..
محمد:عمره 23وهو اخر سنه بالجامعه مملوح(ابيض يهتم بنفسه كثير يعني اهم شي شكله شعره طويل وناعم واسود )ويحب بنت عمه غلا والمشكله انه راعى حركات
الهنوف:عمرها17ثالث ثانوي علمي فرفوشه (بيضا عيونها كبار شعرها اسود طويل طولها عادي رشيقه)دلوعة ابوهاوجدها واخوها خالد..
فهد: ولد خالتهم توفت امه وهو عمره شهرين ام عبدالله ارضعته يعني هو اخوهم بالرضاعه وهو ساكن بالرياض مع ابوه احلى واحد بالعايله كلها وحبوووب لكن اللي يشوفه يحسبه مغرور ومتكبر مع انه على نياته و طيوب ...

ثانيا: عايلة ابوسعود
ابو سعود:اب حنون واهم شي عنده بالدنيا بناته وولده يهتم بشغله بس مو مثل ابو عبدالله
ام سعود: شديده وقويه ووعكس ابو سعود بس طبعا دلوعها سعود اخر العنقود
غاده:اكبر وحده وتتحمل المسؤليه وحلوه وهي برابع جامعه..
غلا:ثالث ثانوي صديقة الهنوف وعليها حركات نفس حركات الهنوف هي تحب محمد بس ما تدري انه يحبها..
غزل:3متوسط مشاغبه لأبعد الحدود تحب تسوي مقالب مره فرفوشه ودايم تتهاوش مع سعود..
سعود: اخر العنقود 3 ابتدائي دلوع العايله ما ينرفض له طلب ابد

ثالثا: عايلة ابو مهند
ابو مهند:اهمل عايلته وصب كل اهتمامه على شغله وما يدري عن عياله او بيته ودايم مسافر
ام مهند: اكبر همها الطلعات وماتقعد بالبيت ابد وهي بعد ماتهتم لعيالها
مهند: 3جامعه مملوح حيل وراعى حركات وما خلى بنت ما شبك معها وصاحب محمد ولد عمه وهو بعد ما ينشاف بالبيت الا نا درا
فجر: ثالث ثانوي ادبي متحمله مسؤلية اخوانها تحبهم حيل وتخاف عليهم وهي بنت مملوحه ونعومه..
اصايل :اول ثانوي حبوبه وما تحب تدرس تحب اختها فجر واي شي خطاء يصيربالبيت تلوم امها وابوها..
فيصل:ثالث ابتدائي يحب اخته فجر متعلق فيها حيل
دانيه: اول ابتدائي حتى هي تحب اختها فجر ومتعلقه فيها

عايلة ام فارس
ابو فارس و ام فارس فارس(26سنه يشتغل) دانه(2جامعه) مرام(2ثانوي) رهف(5ابتدائي)

عايلة ام بدور
ابو بدور(خال غلا) وام بدور(عمة غلا) بدور(5ابتدائي) انفال (3 ابتدائي) وجنا(سنتين)

عايلة ام عمار
ابو عمار(حتى هو خال غلا)ام عمار(عمة غلا) عمار(3 سنوات)

**الجزء الاول**

في بيت ابو عبدالله
الهنوف توها واصله من المدرسه وطالعه الدرج وهي تعبانه فيها النوم وما صدقت وصلت غرفتها
واخذت لها شاور سريع ونزلت ركض ع المطبخ تبي تتغدى..
وتدخل المطبخ بهدوء وتلاقي امها مع الخدامات وتقول بصوت عالي
الهنوف: بوووووووووووووووو
ام عبدالله: بسم الله الرحمن الرحيم .. الناس يقولون السلام عليكم مو يصارخون..
الهنوف: هههه...سووري.... يمه جوووعاااااااانه
ام عبدالله: طيب هالحين احطلك الغدى
الهنوف: وابوي واخواني؟
ام عبدالله : ابوك ماراح يجي مشغول واخوانك بيتأخرون
الهنوف : اهاااااا طيب
ام عبدالله : الا وين رغد عنك غريبه ما جات معك اليوم
الهنوف: تقول انه امها قالت لها لاتجي عندنا لانها ماخذه يوم راحه وهي بالبيت تنتظرها
ام عبدالله : شكلها تعبانه يلا بعدين اكلمها اشوف وش فيها
الهنوف: اذا كلمتيها قولي لها تخلي رغد تجي العصر عندنا
ام عبدالله: طيب..يلا تغدي وروحي نامي
الهنوف:انشاءالله بس ما ابي ازعاج ابي ارتاح بنومتي
ام عبدالله: والله مدري من مصدر الازعاج بالبيت
الهنوف:هههههههههههههههههههههههههههههههههههه شكرا

(ام الهنوف وام رغد صديقات من ايام الابتدائي ولا افترقوا وام رغد سوريه تزوجت ابو رغد وسافرت سوريا وبعدهابسنتين لقى زوجها شغل بالسعوديه وصاروا ساكنين هنا و ام رغد تشتغل مدرسه بالصبح بالمدرسه وباقي اليوم تدرس دروس خصوصيه لان اهلها بسوريا محتاجين فصارت بنتها رغد كل يوم تروح مع الهنوف وتقعد في بيت الهنوف الى الليل وبعدين تروح بيتهاوالهنوف مستحيل تستغني عنها تحبها حيل وتعتبرها مثل اختها وحتى عايلة الهنوف يعدون رغد منهم وفيهم)

خلصت الهنوف غداها وراحت غرفتها بتنام بس ما قدرت فشالت مخدتها وبطانيتها وراحت الصاله
وانسدحت بالارض ونامت ..

عند باب البيت توه محمد داخل القراج ولقى خالد طالع من سيارته وبيدخل وقف خالد ينتظر محمد ودخلوا البيت مع بعض

محمد: هلا خالد اخبارك؟
خالد: الحمد لله وانت؟
محمد:تمام
خالد :من وين جاي؟
محمد: من الجامعه

وهم طالعين الدرج

خالد: والله تعباااااااان وزهقااااان
محمد : تعبان تغدى وروح نام اما زهقان انشاءالله نلاقي الهنوف صاحيه نستهبل
عليها نطلع لها قرون وصدقني بيروح الزهق
خالد:هههههههه لا حرام عليك
محمد: ياخي وش اسوي احب انرفزها

وشوي ويدخلون الصاله ويلاقون الهنوف نايمه ع الارض ويفقعون عليها ضحك

محمد(وفيه فكره براسه):خالد روح جيب الكاميرا
خالد: وش بتسوي؟
محمد: جيب الكامير اول وبعدين بتفهم

راح خالد يجيب الكاميرا ومحمد جاب منديل ولفه الى ما صار طويل ويدخل خالد ومعه لكاميرا

محمد: يلا صور
خالد: طيب

ويفتح خالد الكاميرا ويبدأ يصور ومحمد يمرر المنديل على وجه الهنوف وشوي عند اذنها ويرجع على وجهها
والهنوف المسكينه تحرك وجهها يمين ويسار ومحمد وخالد فاطسين عليها ضحك .... بدات الهنوف تتضايق من جد
وشوي تفتح عيونها وتلاقي محمد ماسك المنديل وتخزه ذيك الخزه وتلف وتلاقي خالد يصورها وتقوم بسرعه وتصارخ

الهنوف:خااااااااااااااالد وش قاعد تسوي لايكوووووووون تصور؟
خالد( بشوي خوف):هاااه ولاشي ما قاعد اصور
محمد:لا لا يكذب عليك والله يصور
خالد يناظر محمد بمعنى اسكت
محمد : اصلا هو قالي انه زهقان و حب يستانس ولما شافك قالي خل نستهبل عليها
خالد: يالكذاب .. ويلف على الهنوف ويقول.... الهنوف تراه كذاب لاتصدقينه
الهنوف: ما توقعت منك هالحركه يا خالد..... ولفت وهي زعلانه ومعصبه وتبي تصيح..

خالد: محمدوه قول الصدق ترى زعلت
محمد: انا ما لي دخل انت اللي زعلتها

وراح محمد وهو يضحك معه الكاميرا و يدري انه خالد بيراضي الهنوف وانه الهنوف بتدري ان الفكره من راس محمد

خالد : هنايف ... اختي
الهنوف صافطه
خالد: يا قلبي هالحين انتي مصدقه محمد
الهنوف: وليه لا مو الكاميرا كانت بايدك مو انت كنت تصور
خالد: ايه .. بس والله مو فكرتي فكرة محمد
الهنوف تناظره
خالد : يعني انت مصدقه انه انا افكر اسوي لك شي زي كذا
الهنوف: طيب ليه تعاونت معه عليّ؟

خالد : غلطه وتوووووبه ما راح اكررها بس لا تزعلين
والهنوف ماعندها غير الصفط
خالد: خلاص انا اعرف شلون ارضيك.... وش رايك اغديك يوم الخميس بالمطعم اللي تختارينه
الهنوف ابتسمت
خالد : هاه وش رايك؟
الهنوف: اممم طيب موافقه
خالد: حلو يعني رضيتي؟
الهنوف: ايه رضيت
خالد: الحمدلله دام انك رضيتي خل اروح اخذ لي شاور واتغدى وانام
الهنوف : وانا ابي اكمل نومتي
خالد: كمليها بغرفتك ما تضمنين يجي محمد ويخرب عليك
الهنوف: وانت الصادق يلا سلام
خالد: ههههه سلام

وفي بيت ابو مهند

فجر قاعده بالصاله مع فيصل و دانيه وشوي تدخل امهم لانها كانت طالعه من الصبح تسير على جاراتها
ام مهند : السلام عليكم
فجر : وعليكم السلام
ام مهند: هاه تغديتوا
فجر : ايه..
ام مهند: اجل وين اصايل ومهند؟
فجر: اصايل نايمه ومهند بعده ما جاء من الجامعه

ويدخل مهند

مهند: سلااااااااام
ام مهند وفجر: وعليكم السلام
ام مهند: وينك؟
مهند: توني جاي من الجامعه
ام مهند: اها.... اذا تبي غدى خل الخادمه تحطه لك
مهند: هههههههه.. ادري والله ادري اصلا من لي غيرها يرعاني
فجر:هههههههههههههههههههههههههههههههههههههههههههههه هههههههههههه
ام مهند: لاوالله .. وش قصدك؟
مهند: ابد سلامتك....... عن اذنكم

ويروح كل من مهند وامه لغرفته ويتركون فجر والصغار بالصاله

ومرت باقي ايام الاسبوع بطريقه روتينيه وبدون احداث تذكر

ويوم الاربعاء

بغرفة غلا تفتح غزل الباب بكل قوتها
غزل: اففففففففففففففف... زهق
غلا: وانا وش دخلني تقولين لي
غزل: والله جا على بالي اقول لاحد اني زهقانه وغرفتك كانت بالوجه
غلا:امممممممممممممم طيب وش رايك نطلع
غزل: ايه ايه ايه.... بس وين؟
غلا: مدري بس مكان نقعد فيه ونسولف
غزل:اممم وش رايك نروح ستاربكس
غلا: ايه .. طيب امي
غزل :وش فيها امي؟
غلا: مين يقولها؟
غزل:غاده انسب انسانه لمثل هذه المهمات
غلا:طيب روحي قولي لها تقول لامي وانا بتصل على الهنوف بقولها تجي معنا
غزل: الهنوف بالسالفه اجل انشاءالله بنستانس يلا انا رايحه اقول لغاده ادعي لي
غلا:ههههههههههه... طيب

وتدق غلا على جوال الهنوف بس الهنوف بالصاله مع خالد ومحمد ورغد وخلت جوالها بغرفتها

غلا:اففففففف....ليش ماترد...يلا بدق على البيت... تدق ويرد عليها محمد

غلا: الو
محمد:الو
غلا:السلام عليكم
محمد: وعليكم السلام
غلا(ما عرفت شتقول):امم......الهنوف موجوده
محمد(عرفها وفيه الضحكه على سؤالها):ايه..(وحب يحرجها):بس مين اقولها
غلا: ايه... انا غلا
محمد: هلا والله.. اخبارك غلا؟
غلا: تمام... اخبارك انت؟
محمد:الحمدلله...بغيتي الهنوف
غلا:ايه..ناديها لي اذا ما عليك امر
محمد: من عيوني لحظه

محمد:هنيف
الهنوف:خيييييير
محمد:غلا على التلفون تبيك
الهنوف: وانت من اول تسولف معها
محمد:هههههه... والله احس اني ابلشتها
الهنوف:الله يستر تلاقيها معصبه هالحين

الهنوف: الو
غلا(معصبه):وينك انت ما تردين على جوالك ؟
الهنوف:انا قاعده بالصاله مع خالد ومحمد ورغد.......ليش معصبه؟
غلا:اففف ولاشي ياربي نسيت وش ابي منك.....
ايه صح ترى بنروح ستاربكس وش رايك تجين معنا؟
الهنوف:الله وناسه بقول لأمي واكيد بتقول ايه والاقيكم هناك
غلا: خلاص حلو نشوفك هناك
الهنوف: طيب أي واحد
غلا: اللي بالشاطيء مول......ما عمري رحته من يوم ما فتحوه...
الهنوف: اها ....طيب فجر بتجي؟
غلا: مدري ما قلت لها
الهنوف: خلاص انا اقولها
غلا: اوكي...سي يو
الهنوف:سي يو

وفي ستاربكس

الهنوف: وينهم تاخروا
رغد:وانا شو بعرفني
الهنوف: جوا
غاده : السلام عليكم
الهنوف: وعليكم السلام....... هلا والله
غاده: هلا فيك اخبارك من زمان عنك؟
الهنوف:انا تمام التمام......وانت اخبارك وش مسويه مع اخر سنه؟
غاده:الحمدلله ماشيين.......الا وين فجر
الهنوف:فجرهالحين جايه و معها اصايل

تدخل فجر واصايل ويكملون القعده ضحك سوالف ووناسه

وبالليل بعد ما راحت رغد بيتها قعدت الهنوف على النت في غرفتها
وشوي يدخل خالد ويقعد عندها

خالد:هاه وين تبين اغديك بكرا؟
الهنوف:امممممممممممم....
خالد:ايه
الهنوف:امممممم.......وش رايك التنور الصيني
خالد:تدرين عاد توقعتك تقولين السمبوك
الهنوف:هههههه.....راحت عليك الاسبوع اللي راح تعشيت فيه مع ماما و
بابا
خالد:لاعاد متى؟وليش ما قلتوا لي اجي معك
الهنوف:والله انت ومحمد رحتوا عرس صاحبك وانا كنت لحالي وابوي جاء بدري
وكل هذي ظروف تخلى الواحد يطلع يتمشى ويتعشى بالمطعم ..
خالد:اها كذا يعني...طيب بكرا تكونين جاهزه الساعه 2خلاص؟
ويدخل محمد
محمد:ليييييييييش؟وش عندكم الساعه2
الهنوف: مو شغلك..
محمد: افاا...كذا يا الهنوف..
مين قالك تزعلني...

وتدخل ام عبدالله و معها عبدالله..

الهنوف: عبووودي..
عبدالله: هههههههه.. عبودي مره وحده...
الهنوف:ادلعك طيب.......والله وحشتني
عبدالله: والله انت اكثر وعلشان كذا بنام عندكم اليوم
خالد:يوه يوه وش عندك؟
عبدالله:والله المدام اختها جات من جده وقالت تبي تنام عند اهلها مشتاقه لاختها
خالد: ياحراااااام وخلتك لحالك
عبدالله:شفت شلون والله دنيا
الهنوف+خالد+عبدالله:هههههههههههههههه
ام عبدالله:: محمد يا قلبي وش فيك يمه ساكت
محمد: الهنوف زعلتني
الهنوف:يااااااااي يا مرهف الاحساس
ام عبدالله:ليش زعلتي اخوك؟
الهنوف:مازعلته ...هواللي زعلني حتى اسألي خالد
محمد:يمه بكرا عندهم شي وما يبون يقولون لي
عبدالله:هههههههههههه......وانت وش عليك
محمد:يا خي فيني فضول ابي اعرف وش مخططين له
عبدالله:وش عندكم؟
تقوم الهنوف وتروح عند عبدالله وتقوله باذنه
عبدالله: وناااسه...طيب وانا؟
الهنوف تلف وتناظر خالد وكأنها تطلب من خالد الاذن علشان عبدالله يجي معهم
خالد:ولا يهمك ليش لا حياك
محمد:لااااااااااااا..........امانه قولوا لي وش السالفه ابي اعرف
ام عبدالله:محمد ما كنت ادري انك ملقوف لهالدرجه
محمد: يمه مو لقافه اسمه فضووووووول........يلا عاد قولوا لي
ام عبدالله:والله كأنك بيبي
الهنوف+خالد+عبدالله+ام عبدالله:هههههههههههههههههههههههههههههههههههههههههه هههه
خالد:يمه وش غداك بكرا؟
ام عبدالله:والله مدري وش تبون؟
الهنوف:غريبه ليش ما تسألين ابوي؟
ام عبدالله: ابوك سافر اليوم وبيرجع السبت
الهنوف:اهااا.........وتلف على خالد وتبتسم خالد فهم انها تطلب اذن ثاني لامها
خالد:ما نبي شي لا انا ولا الهنوف ولا عبدالله اما محمد ما ندري عنه
الهنوف:لالالالالا انا بقولها
وتطب الهنوف عند امها وتقولها باذنها
الهنوف: عاد يمه بس هالمره تعاوني معنا ولا تقولين لمحمد بلييييييييز
ام عبدالله:هههههههه....طيب
خالد:يعني موافقه
ام عبدالله: ايه
عبدالله : والله من جد وناسه
محمد:يمممممممممه وش السالفه قولوا لي اماااااااانه قولوا
الهنوف:لا علشان تعرف ان اللي يزعلني هو اللي يندم بالنهايه
محمد:والله عرفت بس قولوا لي
الهنوف: لا لا لا
محمد: يمه يرضيك كذا؟
ام عبدالله: والله مو شغلي كله بايد الهنوف انا ما بتدخل....يلا تصبحون على خير
محمد: افاا يمه تتخلين عني
ام عبدالله:ههههههه......تصبحون على خير وتروح
محمد قعد يناظر خالد وعبدالله.... خالد ماسك ضحكته:birgits_g وعبدالله مبتسم
محمد:يعني ما راح تقولون.......مو مهم.......وقام بيطلع راح يمشي جهة الباب
عاد الهنوف ما هان عليها اخوها
الهنوف: محمد.......محمد
خالد+عبدالله:ههههههههههههههههه
الهنوف:لا تضحكون ما يهون عليّ
وراحت سحبت محمد وجابته وقعدته بالسرير بجنب خالد
الهنوف: المشكله انك اخوي واحبك وما تهون عليّ ازعلك
محمد:فديت اختي انا......قولي كلي اذان صاغيه
الهنوف:تذكر ذاك اليوم يوم انك وخالد اتفقتوا علي وانا زعلت
محمد:ههههههههههههههه ايه
الهنوف:فديت خالد اخوي قالي بعزمك على المطعم ان رضيتي عاد انا رضيت
محمد: اييييييه
الهنوف:ايه وبكرا الموعد و بناخذ معنا امي وعبدالله
محمد: يعني كنتوا بتروحون بتتغدون بالمطعم وانا لأ
الهنوف: هههههههه.....ايه
محمد: حراااااام عليكم انا اخوكم.......خالد ما بتاخذوني معكم؟
خالد: مالي دخل الهنوف صاحبة الراي
محمد لف يناظر الهنوف ويسوي نفسه بريء
الهنوف:روح مع اخويائك
محمد:لاااا الطلعه معكم والله احلى
الهنوف:افففف.......خلاص كسرت خاطري باخذك معنا
عبدالله:هههههههههه.....والله انك خطيره
الهنوف: ايه اعجبك انا
خالد: لحظه لحظه هالحين انت تعزمين بالناس وانا اللي بتورط وبدفع الحساب
الهنوف: ول ما كنت ادري انك بخيل لهالدرجه
خالد:هههههههههههه.....يقطع شرك خلاص على حسابي اهم شي رضاك يالغلا
الهنوف تقوم عند اخوها وتضمه :فدييييييييييييت اخوي انا
عبدالله:ههههههههه....مصلحه...يلا انا بعد بروح انام تصبحون على خير
خالد: عبدالله خذني معك
ويطلعون عبدالله وخالد وينسدح محمد على السرير
الهنوف:وش عندك؟
محمد:بقعد معك حرام؟
الهنوف: لا ابد حياك......بجيب لي سنكرس وبيبسي تبي شي؟
محمد:مدري وش عندك؟
الهنوف:كل شي......
محمد:عندك جالكسي الجديد
الهنوف:ايه...ماتبي تشرب شي معه؟
محمد:امممم.......عندك بلو كوكتيل بارد؟
الهنوف: ايه بروح اجيب لك
وراحت الهنوف جابت الاكل واعطت محمد حقه وياكلون بهدوء غريب
الهنوف حاسه انه محمد بلسانه شي يبي يقوله بس مو بعارف يسوي مقدمه فقالت اختصرله الطريق واسأله

في بيت ابو مهند

فجر: اففففف........اصايل حطي لنا فيلم او مسلسل او أي شي ثاني بدال الاغاني والله
مليت
اصايل:وش احط لك هالحين الساعه وحده كل الافلام الحلوه خلصت
فجر :اففف والله زهق
اصايل: اشبكي ع النت
فجر: ما في احد ع المسن كل صديقاتي نايمات
اصايل: طيب نامي
فجر: ما ابي انام
اصايل: مشكلتك ما لها حل
فجر:ههههه...... سخيفه

ويدخل مهند ومعه سيديات
مهند: السلام عليكم
فجر+اصايل: وعليكم السلام
مهند:وش تسوون؟
فجر: ولا شي
اصايل: مهند وش ماسك بايدك
مهند:ااااااااه ياربي على اللقافه....انت على مين طالعه ملقوفه؟
اصايل:ولا احد انا مافي احد مثلي
مهند:ياااي يا الواثقه
فجر:مهند بتطلع؟
مهند:لا....ليش؟
فجر: بس سؤال
مهند: يعني لقافه زي اختك
فجر:هههههههه....ايه
مهند: والله شكلك زهقانه ع الآخر
فجر:ايه والله
مهند: امممممممممم........عندي الحل
اصايل: يعني بنطلع؟
مهند: اقول اقعدي بس ما عندنا بنات يطلعون بالليل
اصايل: اجل وشو الحل؟
مهند: اخوكم حاس فيكم وقلبه عليكم
اصايل: ايه واضح
مهند:اكمل والا شلون؟
فجر:اصايل اسكتي... لا لا كمل
مهند:المهم انا جايب معي افلاااااااااام
فجر: اخوي حبيبي شككككككراا..

.انت احسن واحد
مهند : لا داعي لا داعي

وشوي ويدق جوال مهند ويقوم ويطلع برا الصاله
اصايل:تتحدين انه اللي داق عليه وحده من خوياته؟
فجر: لا حرام عليك لا تشكين فيه
اصايل: انا متأكده.... اسمعي بروح اجيب السيديات وبكتشف اذا كان صدق كلامي او لا؟
فجر:ههههههه......طيب

وراحت اصايل عند مهند وتحاول تسمع وش يقول ما قدرت فقررت انها تروح تكلمه

اصايل:مهند عطني السيديات بنختار فيلم
مهند: خذي
اصايل: ننتظرك

نوره(خوية مهند):حبيبي مين هاذي؟
مهند:اختي
نوره:وش اسمها؟
مهند:اصايل
نوره:اسمها حلو
مهند: طبعا لاني انا اللي سميتها
نوره: مشاءالله ذوقك حلو
مهند: اكيد والا ما كان اخترتك من بد هالبنات

واللي ما يعرفه مهند انه اصايل وقفت ورا الباب وقعدت تسمع وش يقول

اصايل (وهي جايه ركض): شفتي...قلت لك
فجر وش يدريك؟
اصايل:يقولها لو ذوقي مو حلو ماكان اخترتك من بد هالبنات
فجر: احلفي
اصايل: والله والله والله
فجر: آآه الله يهديه

نرجع لمحمد والهنوف
الهنوف: تكلم وش عندك؟
محمد:هههههههه.....اختي وفاهمتني
الهنوف: هذا شي اعرفه ابي اللي بعده
محمد:اممممممم........غلا
الهنوف: وش فيها غلا؟
محمد: مدري
الهنوف: محمد تكلم ترى ما اقول لاحد وش فيها غلا؟
محمد:اممم.....احبها
الهنوف(مستانسه):احللللللللللف
محمد: والله....ليه مستانسه ؟
الهنوف وفي بالها الحمدلله انه يبادلها نفس الشعور

محمد:هنيف وش فيك ....الووووووو
الهنوف:هااه ابد سلامتك....ايه قول بعد اسمعك
محمد:اممممم.....بس خايف ابتلش بالنهايه
الهنوف: ليه؟
محمد: انت تعرفين غلا شلون...قصدي انها بنت حلوه ومؤدبه وكلن يتمناها
الهنوف: ايه
محمد:وفيه ولد خالتها ناصر مشاءالله عليه كل شي فيه زين
الهنوف: ايه
محمد: ابد واحس انه في احتمال يعني.......يوه انت غبيه ما فهمتي
الهنوف: وش فيك عصبت
محمد: ماني قادر اوصل المعلومه وانت مانتي براضيه تفهمين
الهنوف:ههههههههههه...لا فهمت قصدك انه فيه احتمال ناصر ولد خالتها يخطبها وهي ما تلاقي فيه عيب
فتوافق هاذي معلومتك اللي تبي توصلها
محمد:ايييييييييه عليك نور
الهنوف: ما اظن
محمد: ليه؟
الهنوف: لانه غلا دايم تقول انه ناصر مثل اخوها ومستحيل يكون أي شي ثاني
محمد: هي قالت كذا؟
الهنوف: ايه وش فيك مو مصدق
محمد:لالا صدقت.....طيب فيه احد بحياتها؟يعني تحب؟
الهنوف: مدري..
محمد: عليّ اكيييد فيه وتعرفين بس ما تبين تقولين لي صح؟
الهنوف: وش فيك قلت لك ما اعرف
محمد:طيب خلاص بحاول اصدقك

وكملوا سهرتهم صلوا الفجر وبعدين محمد راح غرفته ونام والهنوف راحت نامت عند امها
ومن بكرا الساعه وحده الظهر والهنوف في سابع نومه

ام عبدالله:الهنوف.........الهنوف يلا قومي
الهنوف:اممممممم..........بعد شوي تعالى
ام عبدالله:هنيف يلا قومي الساعه وحده وخالد قال تكونين جاهزه الساعه 2
الهنوف:ايه صح .......امري لله يلا قمت

الهنوف قامت اخذت شاور وصلت الظهرو لبست واخذت عباتها وراحت الصاله
لقت خالد وعبدالله وامها جاهزين وينتظرونها هي ومحمد
وشوي وينزل محمد وشكله نفس شكل الهنوف عيونه منتفخه وفيه النوم
الهنوف:هههههههه....محمد والله اشكالنا تضحك
محمد:ايه والله هالحين نروح المطعم ونخوف الناس
الهنوف:تعال عندي فكره

راحت جابت قطعتين ثلج وحده لها والثانيه لمحمد ويحطونها على عيونهم علشان يروح الانتفاخ
وراحوا المطعم وضحك وناسه واكل وكل شوي يتذكرون مواقف صارت لهم هم وصغار....
ورجعوا البيت ويبدلون ملابسهم لان كل خميس تصير جمعه ببيت جدهم من المغرب الى الساعه وحده بالليل تقريبا...وانتهى يوم الخميس...

ومر يوم الجمعه عادي

ويوم السبت بالمدرسه في وقت الفسحه
الهنوف قاعده مع رغد وغلا وشلتهم وشوي تجي فجر ومعها اصايل بيقولون للبنات وش اكتشفت اصايل في مهند

الهنوف:اصلا قديمه مره سمعناه انا ورغد يكلم وحده بس ما قلنا لاحد
اصايل:مشاءالله اخونا وحنا اخر من يعلم

وتجي بنت(اسمها نوره) كانت دايم تناظر الهنوف وتبتسم لها و الهنوف ما تعرفها بس ترد لها الابتسامه

نوره:هلا فجر .......اخبارك؟
فجر(مستغربه):الحمدلله تمام
نوره: وانت الهنوف اخبارك؟
الهنوف: تمام..
نوره:الهنوف ممكن اكلمك شوي.....
الهنوف: طيب.......وتقوم معها ويروحون بعيد شوي
نوره: الهنوف ممكن رقم جواك؟
الهنوف: ليه؟
نوره:الصراحه حسيت انك بنت طيبه وحبوبه وابي اتعرف عليك واصير صديقتك
لاني ابي ابعد عن صديقاتي انت شفتيهم حركاتهم شلون
الهنوف:ايه صح ....طيب خذي رقمي*******050
نوره: خلاص انشاءالله اكلمك اليوم

وترجع الهنوف عند الباقيين
فجر:الهنوف وش كانت تبي منك نوره ؟
الهنوف:تبي تصير صديقتي
فجر: اها وانا اقول غريبه ما زمان ما سلمت عليّ طلعت تبيك
الهنوف: ليش انت تعرفينها؟
فجر:ايه...كانت من اعز صديقاتي بس تغيرت وصارت حركاتها ما تعجبني فتركتها الهنوف انتبهي منها..
الهنوف: اصلا هي قالت لي انها تبي تتغير وتترك صديقاتها
فجر:الله يسمع منك....

نهاية الجزء الاول

تتوقعون وش بيصير لمحمد وغلا؟
ومين تطلع نوره وهل بتغير بالقصه شي؟
توقعاتكم للجزء الجاي

هالجزء تقريبا ما فيه شي مهم قاعده اعرفكم شلون الاجواء صايره في اهم البيوت بالقصه
وراح تلاقون الحماس بالاجزاء الجايه انشاءالله